Një plan ushqimor shtatëditor i krijuar nga një dietolog i regjistruar synon të ndihmojë në mbajtjen më të qëndrueshme të nivelit të sheqerit në gjak, duke kombinuar ushqimet e pasura me fibra, karbohidratet cilësore dhe burimet e proteinave.

Sipas EatingWell, plani nuk përmban sheqer të shtuar dhe është ndërtuar për të ofruar vakte të balancuara, të cilat mund të ndihmojnë edhe në tretje, shëndetin e zemrës, kontrollin e peshës dhe parandalimin ose menaxhimin e diabetit.

Çfarë përmban plani?

Ideja kryesore është rritja e konsumit të fibrave dhe zgjedhja e karbohidrateve që treten më ngadalë. Plani ofron të paktën 104 gramë proteina në ditë dhe është përshtatur në tre nivele energjie – rreth 1,500, 1,800 dhe 2,000 kalori, në mënyrë që të mund të përshtatet me nevojat e ndryshme ushqimore.

Dita e parë

Dita nis me një mëngjes të pasur me proteina dhe vazhdon me një drekë dhe darkë të balancuar, ndërsa gjatë ditës parashikohen edhe ushqime të vogla mes vakteve. Në versionin rreth 1,800 kalorive, dita siguron afërsisht 39 gramë fibra dhe 112 gramë proteina. Për ata që kërkojnë një plan më kalorik, mund të shtohen ushqime të tjera, ndërsa për versionin më të lehtë hiqen disa nga snack-et.

Dita e dytë

Plani vazhdon me ushqime të pasura me fibra dhe proteina, duke ruajtur karbohidratet nga burime më të plota. Për një ditë prej rreth 1,800 kalorish, parashikohen afërsisht 46 gramë fibra dhe 104 gramë proteina. Një nga avantazhet e këtij modeli është se disa vakte mund të përgatiten paraprakisht, duke e bërë më të lehtë ndjekjen e planit gjatë një jave të ngarkuar.

Dita e tretë

Në ditën e tretë, fokusi mbetet te kombinimi i proteinave, fibrave dhe karbohidrateve cilësore. Plani arrin rreth 39 gramë fibra dhe 136 gramë proteina, duke ofruar një kombinim që synon të mbajë më gjatë ndjesinë e ngopjes dhe të shmangë luhatjet e forta të energjisë.

Dita e katërt

Edhe kjo ditë ndjek të njëjtin parim: ushqime të plota, shumë fibra dhe burime të mira proteinash. Në versionin bazë, dita përmban rreth 36 gramë fibra dhe 109 gramë proteina. Për të rritur kaloritë, plani lejon shtimin e disa ushqimeve të tjera, pa ndryshuar parimin kryesor të ushqyerjes.

Dita e pestë

Dita e pestë siguron rreth 37 gramë fibra dhe 129 gramë proteina në versionin bazë. Qëllimi është që ushqimet me fibra të kombinohen me proteina dhe yndyra të shëndetshme, në mënyrë që tretja të jetë më e ngadaltë dhe energjia të jetë më e qëndrueshme.

Dita e gjashtë

Kjo është një nga ditët me përmbajtjen më të lartë të fibrave, rreth 48 gramë, së bashku me më shumë se 100 gramë proteina. Përfshihen kombinime të ndryshme ushqimesh dhe snack-esh, të cilat mund të përshtaten sipas nivelit të kalorive që kërkon personi.

Dita e shtatë

Java mbyllet me një plan që siguron rreth 49 gramë fibra dhe 119 gramë proteina në versionin prej rreth 1,800 kalorish. Edhe këtu ekzistojnë alternativa për ta ulur ose rritur sasinë e kalorive, pa hequr dorë nga parimi i ushqimeve të pasura me fibra dhe pa sheqer të shtuar.

A duhet të hiqen të gjitha karbohidratet?

Jo. Një nga mesazhet kryesore të planit është se karbohidratet nuk duhet të eliminohen plotësisht. Sipas dietologëve të cituar nga EatingWell, rëndësi ka lloji i karbohidrateve, sasia dhe mënyra se si kombinohen me proteinat, yndyrnat e shëndetshme dhe fibrat. Drithërat integrale, frutat, fasulet dhe thjerrëzat janë shembuj të karbohidrateve që mund të jenë pjesë e një ushqyerjeje të shëndetshme.

Plani gjithashtu thekson se frutat nuk duhen shmangur vetëm sepse përmbajnë sheqer natyral. Frutat e plota ofrojnë fibra, ujë, vitamina, minerale dhe përbërës të tjerë të dobishëm, ndaj ndikimi i tyre në organizëm nuk është i njëjtë me atë të ushqimeve të përpunuara me sheqer të shtuar.

A është ky një plan për të gjithë?

Jo domosdoshmërisht. EatingWell thekson se nevojat ushqimore ndryshojnë nga një person te tjetri dhe plani duhet të përdoret si frymëzim, duke u përshtatur sipas nevojave individuale.